Кеча, 31 январь куни Аргентина терма жамоаси 2024 йилда Парижда (Франция) бўлиб ўтадиган Олимпиада ўйинларига саралаш баҳсида Чили терма жамоасини 5:0 ҳисобида мағлуб этди.
Учрашув давомида аргентиналик ярим ҳимоячи Клаудио Эчеверри касал бўлиб қолди ва уни замбилда майдондан олиб кетишди.
"Ўйин давомида кўкрагимда жуда қаттиқ оғриқ бор эди. Мен тўғри нафас ололмадим. Бу мен билан олдин ҳеч қачон содир бўлмаган. Мен қўрқдим. Нима бўлганини тушуниш учун шифокорлар билан гаплашаман", - деди Эчеверри Goal.com билан суҳбатда.
Январь ойида Эчеверри "Ривер Плейт"дан "Манчестер Сити"га ўтди, бироқ Аргентина клубида 2024 йилнинг декабрь ойи охиригача ижара асосида қолади. Трансфер суммаси 14,5 миллион еврони ташкил этди. Футболчининг “шаҳарликлар” билан шартномаси 2028 йилнинг ёзига қадар тузилган. Transfermarkt 18 ёшли футболчини 12 миллион еврога баҳоламоқда.
2022/2023 йилги мавсумда Эчеверри олтита ўйин ўтказиб, битта голли узатмани амалга оширган.
