"Манчестер Юнайтед" ярим ҳимоячиси Кристиан Эриксен "Брентфорд"га қайтиши мумкин. Бу ҳақда Metro нашри хабар бермоқда. Манбага кўра, "асаларичилар" 31 ёшли футболчини келаси ёзда трансфер қилишга тайёр.
Аввалроқ, данияликнинг хизматларига Туркиянинг "Галатасарой" клуби қизиқиш билдираётгани ҳақида хабар берилганди. Эслатиб ўтамиз, Эриксен 2022 йил январдан июлгача "Брентфорд"да ўйнаган, кейин эса "Манчестер Юнайтед"га ўтганди.
Жорий мавсумда ярим ҳимоячи майдонда 19 та ўйинда майдонга тушиб, битта гол урган ва иккита голга ассистентлик қилган. Эриксеннинг клуб билан шартномаси 2025 йилнинг ёзига қадар мўлжалланган.
