"Рома"да ижара асосида ўйнаётган "ПСЖ" ярим ҳимоячиси Ренату Саншеш "Бешиктош" билан музокаралар олиб бораётганлиги аввалроқ хабар қилинганди.

Португалиялик римликларнинг асосий таркибига кира олмади, шунинг учун у мавсумнинг иккинчи ярмини бошқа жамоада ўтказмоқчи. Бир неча кун олдин маълум бўлганидек, "Бешиктош" ярим ҳимоячини ўз сафида кўрмоқчи, аммо журналист Элеонора Троттанинг ёзишича, музокаралар давом этмаяпти. Муаммолардан бири шундаки, турк клубида Саншешнинг жисмоний тайёргарлигига шубҳа бор. Футболчининг ўзи ҳам трансфернинг мақсадга мувофиқлигига ишончи комил эмас.

Ренату Саншеш бу мавсумда "Рома"нинг бор йўғи 9та ўйинда майдонга тушди. Футболчининг "ПСЖ" билан шартномаси 2027 йилгача мўлжалланган.