"Андижон" трансферларни амалга оширишда давом этади. Иқтидорли футболчилар – Шерзод Эсанов, Бектемир Абдуманнонов ва Абубакир Режаббоев янги мавсумда «Андижон» таркибида тўп тепадиган бўлди.

Мухлисларимизга яхши маълумки, Эсанов «Андижон»га 2022 йилги мавсумда қўшилган. Ўтган йили эса биринчи даврадан сўнг «Олимпик» клубига ижарага берилганди. Чемпионат тугагач, унинг шартномаси якунланди. Кўриб турганингиздек, Шерзод яна «Андижон»га қайтди ва янги битим имзоланди.

Эсанов 2003 йилнинг 1 февраль куни Навоийда таваллуд топган. «Чиғатой»да футбол билан шуғулланган. Айтиш лозимки, Эсанов ўтган йили юртимизда бўлиб ўтган U-20 Осиё чемпионатида терма жамоамиз сафида ғолибликни қўлга киритган.

Жамоанинг яна бир янги аъзоси – Бектемир Абдуманнонов 2002 йилнинг 12 июль куни Жиззах вилоятининг Бахмал туманида таваллуд топган. «Пахтакор» академиясида таҳсил олган ва 2019 йили биринчи лигада тўп сурган. 2020 ҳамда 2021 йилларда «Олимпик» шарафини ҳимоя қилган. Шундан сўнг «Металлург»га кўчиб ўтган ва 2023 йил охирига қадар бекободликлар учун тўп тепди.

Абубакир Режаббоев 2005 йилнинг 3 апрель санасида Андижон туманида туғилган.

2016 йили Андижондаги Шўрбулоқ даҳасида жойлашган футбол академиясига кирган ва ўша ерда катта футболга қадам босган. Режаббоев сўнгги икки йил мобайнида «Андижон-SGS»да аввалига биринчи лига, сўнгра про лигада тўп тепди. Истеъдодли ҳимоячи шунингдек, Ўзбекистон U-18 терма жамоаси аъзоси ҳисобланади.

«Андижон» матбуот хизмати.