Ўзбекистон ўсмирлар терма жамоаси БААдаги навбатдаги ўйинида мезбонлар ўсмирлар терма жамоасига қарши учрашувда мағлубиятга учради.

Мезбонлар ўйиннинг 6-дақиқасида Муҳаммад Акбарий томонидан пенальтидан урилган гол эвазига ҳисообда олдинга чиқиб олишган бўлса, 18-дақиқада Али Ғулом бурчакдан етказиб берилган тўпни дарвозамизга йўллаб, ҳисобни 2:0га етказди. Ўйин тугашига 2 дақиқа қолганида Дилшод Нуралиев шогирдлари битта жавоб тўпини киритишга муваффақ бўлишди. Таъкидлаш лозим, иккинчи бўлим бошида БАА дарвозабони Муҳаммад Ҳассан майдондан четлатилганидан кейин, деярли бир бўлим давомида терма жамоамиз бир киши кўп бўлиб майдонда ҳаракат қилишди.

Ушбу жамоалар ўртасида икки кун аввал бўлиб ўтган баҳсда ўзбекистонликлар 1:0 ҳисобида ғалаба қозонишганди.

Иккинчи ўйиндан кейин БАА ўсмирлар терма жамоаси бош мураббийи Рашид Амир ўз шогирдларининг ҳаракатларига юқорига баҳо берди.
"Иккинчи ўйинни яхши ўтказдик. Ўйлайманки, биринчи ўйинда ҳам мағлубиятга муносиб эмасдик. Унда кўплаб вазиятларни глога айлантира олмагандик. Биринчи ўйинда йўл қўйган хатоларимизни кўриб чиқдик ва иккинчи ўйинда уларга йўл қўймасликка ҳаракат қилдик. 90 дақиқа давомида шогирдларим тактик жиҳатдан тўғри ҳаракат қилишди, айниқса, дарвозабонимиз майдондан четлатилиб, 44 дақиқа давомида 10 киши бўлиб ҳаракат қилганимиздан кейин. Осиёнинг амалдаги чемпионини мағлуб этганимиз бизга ишонч туйғусини беради. Демак, биз тўғри йўлдан кетяпмиз", дейди Рашид Амир.