Жамоамиз кўригида атиги бир кун бўлган Лочин Солиевнинг «Шўртан»да қолишига бир баҳя қолганди. Бироқ у эртаси куни яна «Андижон»га қайтиб кетди. «Шўртан»нинг «Динамо» билан ўртоқлик ўйинида Лочин Солиев захирадан майдонга тушиб, ҳатто гол уришга муваффақ бўлди. Лекин ўйиндан кейин эртаси куни у жамоани тарк этди.

Бу ҳақда клуб бош мураббийи Эдгар Гессдан сўраганимизда шундай жавобни олдик: «Солиевни мен қўйиб юборганим йўқ, «Андижон» клуби президенти қўнғироқ қилиб Лочиндан жамоага қайтишини сўради ва футболчи бунга рози бўлди. Биласиз, андижонликлар бир йилнинг ўзидаёқ олий лигага қайтишга ҳаракат қилишмоқда, шу боис уларга Солиевга ўхшаган гол урадиган ҳужумчи керак бўлади. Лочин биз билан шартнома тузмагани учун унинг кетишига тўсқинлик қилмадим».