Туриннинг "Ювентус" клуби кейинги трансфер ойнасида ярим ҳимоячи Пол Погба билан хайрлашишни режалаштирмоқда. Бу ҳақда Tuttosport нашри хабар бермоқда.
Манба берган хабарга кўра, Туринликлар франциялик футболчини ўз режаларига киритишмаяпти. "Бьянконерилар" ундан ва унинг юқори маошидан қутулмоқчи.
Погба 2022 йилнинг ёзида "Ювентус"га ўтган эди. Ярим ҳимоячининг клуб билан шартномаси 2026 йилгача мўлжалланган. Жорий мавсумда франциялик футболчи ўз жамоасининг иккита ўйинида иштирок этди.
Эслатиб ўтамиз, Погба Италия чемпионатининг жорий мавсуми 1-тури доирасидаги “Удинезе”га қарши ўйиндан сўнг (0:3) допинг-тестдан ижобий ўтган эди.
Аввалроқ ОАВда Италия антидопинг прокуратураси Погбани 4 йилга дисквалификация қилишни сўрагани ҳақида маълумот пайдо бўлганди.
