Фарғона вилояти етакчиси сифатида пулкада иштирок этган Фарғона давлат университетининг футбол жамоаси мусобақани 3-ўринда якунлаганди.

Жорий йилнинг 10 январь куни Фарғона ДУ жамоаси вакиллари Лига билан учрашув ўтказди. Унда жамоа Лига аъзоси бўлиш учун қандай ҳужжатлар тайёрлаши лозим эканлиги юзасидан сўз борди. 9 февраль куни эса университет ректори Баҳодиржон Шермуҳаммадов имзоси билан жамоанинг тегишли ҳужжатлари Лигага расман тақдим этилди. 20 февраль куни жамоа Биринчи лигага қўшилиш учун навбатдаги қадамни ташлади.  

Шу тариқа Фарғона давлат университети футбол жамоасининг Биринчи лигада тўп суриши мақсадга мувофиқ деб топилди. Ўзбекистон Профессионал футбол лигаси олий таълим муассасалари қошида спорт жамоалари ташкил этилишини қўллаб-қувватлайди ва бугунги санани ўзи учун тарихий саналардан бири сифатида эътироф этади.

Қайд этиш керак, Ўзбекистон Республикаси Президентининг 2023 йил 7 апрелдаги «Оммавий ва профессионал футболни ҳар томонлама ривожлантиришнинг қўшимча чора-тадбирлари тўғрисида»ги ПҚ-115-сонли Қарорида давлат олий таълим муассасаларида уларнинг моддий-техника базасидан келиб чиқиб, футбол бўйича доимий фаолият юритувчи секциялар фаолиятини йўлга қўйиш, давлат олий таълим муассасаларидаги мавжуд спорт иншоотлари ва футбол майдонларининг доимий фаолият кўрсатишини таъминлаш чораларини кўриш, ҳар бир давлат олий таълим муассасасининг футбол ва футзал бўйича жамоалари бўлиши ҳамда олий таълим муассасалари рейтингини аниқлашда мазкур ҳолатлар инобатга олинишини назарда тутиш алоҳида кўрсатиб ўтилган.

Фарғона давлат университетининг мини футбол жамоаси 2022 йилда ўтказилган Coca Cola students cup мусобақасида иштирок этган бўлиб, унда ўз вилояти босқичида финалга қадар этиб борганди. Ишонамизки, университетнинг катта футболдаги қадами давомий ва муносиб бўлади.