27 февраль куни 2013 йилги Ўзбекистон Кубоги ва Ўзбекистон Биринчилиги баҳсларига қуръа ташлаш маросими бўлиб ўтади.

Қайд этиш жоиз, Ўзбекистон Кубогининг ўтказилиш форматида бир қатор ўзгаришлар юз берди. Бу йилги мусобақа қуйидаги тартибда ўтади:

Биринчи босқич – саралаш. Жорий йилнинг март ойида Биринчи Лига жамоалари орасидан 1/16 финал босқичида иштирок этадиган клубларни аниқлаш мақсадида ўтказилади. Рақиблар қуръа асосида аниқланади. Босқич битта ўйиндан иборат бўлади. Мусобақа жадвали (сеткаси) бўйича юқорироқ турган жамоа «майдон эгаси»га айланади.

Иккинчи босқич. 1/16 финал. Унда саралаш босқичида ғолиб чиққан Биринчи Лига жамоалари ва Олий Лига клублари иштирок этади ҳамда улар, қуръа асосида, мусобақа жадвали (сеткаси)даги 1Вдан то 12Вгача бўлган рақамларга бўлиб чиқилади. Айни вақтда, 2012 йилги Ўзбекистон Чемпионати баҳсларида мос равишда 3- ва 4-ўринни эгаллаган «Локомотив» ва «Насаф» жамоалари фақат 6В ва 7В рақамлари учун қуръада қатнашади.

2013 йилги Осиё Чемпионлар лигаси иштирокчилари – 2012 йилги Ўзбекистон чемпиони «Пахтакор» ва 2012 йилги Ўзбекистон Кубоги соҳиби «Бунёдкор» жамоалари 2013 йилги Ўзбекистон Кубогидаги иштирокларини чорак финал босқичидан бошлайди. Қайд этиш жоиз, «Пахтакор» ва «Бунёдкор» жамоалари қуръа натижасига кўра мусобақа жадвалида (сеткаси)да «А» ёки «В» ўринни эгаллайди.

Иккинчи босқич ўйинлари бир ўйиндан иборат бўлади ва мусобақа жадвали (сеткаси)да юқори турган жамоа майдонида, яъни, Биринчи Лига жамоалар майдонида ўтказилади.

2013 йилги Ўзбекистон Биринчилиги биринчи босқичи баҳслари аввалги форматда ўтказилади.