Томас Тухель ҳақидаги хабарларни ўқидингиз, эшитдингиз. У ҳам Клопп ва Хави сингари мавсум охирида жамоадан кетади. Лекин бу уч мураббийнинг тақдирлари нақадар турлича: Бири мухлислар босимидан, танқиду эътирозлардан тўйиб кетиб, кетишини ўзи эълон қилган бўлса, бири шарафли фаолиятни чиройли якунлаш ниятида, ярим йилда ўзига муносиб мураббий танлашга имкон улашиб кетажагини айтди.

Тухелни эса "Бавария" раҳбарияти кетказмоқда. Бу эълон “Ливерпул”дан кўра "Барселона"никига яқин: бўлди, Томасга ёпишаверманглар, у кетади, мюнхенликлардан энди босим кўтарилади, қабилида...

Ҳа, катта жамоаларнинг қисмати бўлакча. У ерга мураббий бўлиб бораётган одам аввало муваффақиятсизлик оқибати нечоғлик жиддий бўлишини тахмин қилиб бориши керак. Доимо чўққида юрган клуб озгина ерга қуласа, мухлислар зардаси, раҳбарият баҳонаси ва юлдуз ўйинчиларнинг бу ҳолатга тайёр бўлмаган ҳолда Киммихга ўхшаб ўзларини телбаларча тутишини ҳисобга олмоғи лозим.

Тухель мавзусини шу билан ёпиб туришади. "Бавария" "Лацио"дан ўтмай қолса, балки яна давом этар ва Тухель истеъфоси яна кўриб чиқилар, яъни ҳозироқ чиқиш эшиги кўрсатилар. Аммо янги мураббийга ҳам тизгин қўлдан чиқиб кетган клубда осон бўлмаслиги кўриниб турибди.

Хуллас, мураббийлар бир пайтда кетиши мумкин жамоаларнинг қисмати нақадар фарқлилиги бу мавсумнинг энг эсда қоларли воқеаси бўлмоқда.

Хайрулла Ҳамидов.