Кеча «Шўртан» навбатдаги ўртоқлик учрашувини ўтказди. Олий лига дебютанти «Гулистон» билан кечган баҳсда Эдгар Гесс шогирдлари 2:2 ҳисобида дуранг қайд этишди.

Аввалига «Гулистон» ҳужумчиси Носир Отақўзиев ҳисобни очди. Кейинчалик иккинчи бўлимда Павел Соломин пенальтидан унумли фойдаланиб ҳисобни тенглаштирди. Орадан бироз вақт ўтиб «Нефтчи»дан келиб қўшилган Шукур Жумабоев ғузорликларни битта тўп фарқи билан олдинга олиб чиқди. Лекин ўйин тугашига саноқли дақиқалар қолганида Бахтиёр Ашурматов шогирдлари ҳисобни тенглаштиришнинг уддасидан чиқишди. Бу вазиятда Алишер Шоғуломов гол уришга муваффақ бўлди.

Ўйин дабдаласи чиқиб кетган майдонда ўтказилгани боис кўп ҳам қизиқ ўтмади. Бунда асосан жисмоний курашлар кечди. Бундан ташқари, Артурас Фоменконинг кераксиз вазиятда қизил карточка олиб майдонни тарк этиши ҳам "Шўртан" аъзоларини хуноб қилди. Бу ҳолат биринчи тайм тугашига чамаси ўн дақиқача вақт қолганида содир бўлди.

Энди ғузорликлар навбатдаги назорат баҳсини эртага «Олмалиқ»қа арши ўтказишади. Ўйин Қибрайдиган стадионда соат 15:30да бошланади.

Ўртоқлик учрашуви. 22 февраль.
«ШЎРТАН» - «ГУЛИСТОН» - 2:2
«Шўртан»: Павел Леус, Обид Жўрабоев, Шавкат Раимқулов, Асрор Алиқулов, Вячеслав Пономарёв, Ботир Қодирқулов, Дилявер Абибуллаев, Иброҳим Отахонов, Ильнур Хазигалиев, Александр Востриков, Артурас Фоменко.
Захирадан тушганлар: Александр Корнейчук, Ярослав Крушельницкий, Павел Соломин, Азиз Мансуров, Шукур Жумабоев, Жамол Отақулов, Элёр Интизомов, Аббос Омонов, Хумоюн Абдуалимов, Зоҳид Раупов.