Суперлига 1-туридан ўрин олган "Навбаҳор" – "Динамо" (3:1) учрашувидан сўнг мезбонлар бош мураббийи Самвел Бабаян дастлабки ўйиндаги ғалаба, рақиб ва жамоага янги келган ўйинчилар ҳақида фикр билдирди.

"Ўйинни тўлалилича назорат қилдик. Дастлабки сониялардан то охиригача устунликни сақлаб турдик. Вазиятлардан фойдаланганимизда биринчи таймнинг ўзидаёқ ўйинни ўз фойдамизга ҳал этиш мумкин эди. Футболчиларим бугун нималарга қодир эканликларини кўрсатишди.

Рақиб ҳақида нима дейман, уларга респект. Билишимча, бу жамоа хусусий маблағлар эвазига шакллантирилиб келмоқда. Акционерларга раҳмат, боиси, бугун футболга маблағ топиш мураккаб иш. Шундай шароитда уларни молиялаштириб келаётганларга раҳмат.

Ҳақназари режамиз асосида ҳаракат қилганини айта оламан. У кўрсатмаларни тўлиқ бажара олди. Шунчаки, майдонга янги куч ташлаш мақсадида Жияновни туширдик. У тушиши билан жамоа 2-3 дақиқада бир неча голли вазиятлар яратди.

Бу Одил учун янги жамоа. Мухлислари анча кўп жамоа шарафини ҳимоя қилаяпти. Бу ҳам ўз навбатида унинг фаолиятига яхшигина туртки дейиш мумкин. Одил даражаси юқори футболчи. Бундай футболчи билан ишлаш ҳар қандай мутахассис учун орзу бўлса керак. Очиғи, анчадан буён у билан ишлашни орзу қилардим. Авваллари айрим сабабларга кўра бу амалга ошмаган эди. Ҳозир эса у жамоамиз футболчиси. Ўйлашимча, унинг ўзи ҳам бу жамоада эканидан хурсанд.

Ҳозир айрим футболчилар эндигина биргаликда ўйнашни бошлашди. Ҳавотир бор. Аммо, умид қиламанки, бу машғулотлар жараёнида сайқалланади. Навбаҳоръда ким асосий таркибда ўйнаши муҳим эмас, асосийси ким ўйнаса ҳам жамоага фойда келтириши керак". - деди Бабаян.