"Рома" ҳужумчиси Пауло Дибала ёзги трансфер ойнасида "Барселона"га ўтиши мумкин. Давид Бернабеу хабарига кўра, 30 ёшли футболчининг хизматлари Каталония клубига таклиф қилинган.
Маълумотларга кўра, Дибаланинг "Рома" билан шартномасида 12 миллион евро товон пули мавжуд бўлиб, "Барселона" келгуси ёзда уни ишга тушириши мумкин.
Манбага кўра, Дибаланинг ўзи фаолиятини Испанияда давом эттирмоқчи. Қайд этилишича, аргентиналик футболчи “Барселона” учун устувор вариант ҳисобланмайди, аммо “блауграна” уни кузатиб боради.
Жорий мавсумда Дибала барча турнирларда 26 та ўйин ўтказиб, 13 та гол урди ва 7 та голли узатмани амалга оширди. Футболчининг "Рома" билан шартномаси 2025 йилнинг ёзига қадар мўлжалланган.
