"Барселона", "Севилья" ва Хорватия терма жамоасининг собиқ ҳужумкор ярим ҳимоячиси, ҳозирда Саудиянинг "Аш-Шабаб" клубида тўп тепаётган Иван Ракитич "Реал" президенти Флорентино Переснинг сиёсати ҳақида фикр билдирди.

"Мен бу мавсумда "Реал"нинг устунлиги ҳақида гапирмаяпман, лекин улар кучли жамоага эга бўлиш ва бир неча йил давомида жаҳон миқёсида етакчилик қилиш учун ҳамма нарсани қилишмоқда.

Мен буни катта ҳурмат билан айтаман, чунки у кўп йиллар давомида менинг рақибим бўлиб келган, аммо Флорентино Перес нималарга эришганини кўриб, "браво!" дейман. Улар хоҳлаган нарсаларини олишади. Уларнинг албатта ўзига хос режаси бор.

Президентлар ҳар доим ҳам ҳамма нарсани тўғри қилишмайди, лекин Переснинг қарорлари тўғри ва асосли.

Мен футболчиларнинг трансферлари, стадион, клуб имижи ва умуман, уни ўраб турган барча нарсалар ҳақида гапиряпман.

Уни табриклаш мумкин", - дея Ракитичнинг сўзларини келтирмоқда Marca.