Мадриднинг “Реал” клуби ярим ҳимоячиси Арда Гюлер ижарага берилмайди.
19 ёшли футболчининг жамоадан кетиши мумкинлиги ҳақидаги миш-мишлар унинг камдан-кам майдонга тушиши муносабати билан пайдо бўлди. Яқинда Ла Лига доирасида "Сельта Виго"га қарши ўйинда (4:0) ёш туркиялик "Реал" сафида захирадан майдонга тушганидан сўнг ўзининг дебют голини киритди. Ўйиндан кейинги интервьюда футболчи "Лос Бланкос"да ўйнаганидан хурсанд эканлигини ва таркибдаги ўрни учун курашиш ниятида эканини таъкидлади.
Diario AS'нинг янгиланган маълумотларига кўра, "Реал" келаётган ёзда Гюлерни ижарага бермоқчи эмас, ҳужумкор ярим ҳимоячининг ўзи ҳам ҳеч қаерга кетиш ҳақида ўйламаяпти. Янги мавсумда ўсиб бораётган юлдуз Карло Анчелотти жамоасида каттароқ ролга эга бўлиши кутилмоқда.