"Челси" ҳужумчиси Раҳим Стерлинг бўлажак ўйинларда Англия терма жамоасига киритилмаслиги мумкин. Журналист Метт Лоунинг ёзишича, "уч шерлар" бош мураббийи Гарет Саутгейт футболчини март ойидаги ўйинларга таклиф қилмоқчи эмас.

Шунингдек, манбанинг қўшимча қилишича, Стерлинг Германияда бўлиб ўтадиган Европа чемпионатида иштирок эта олмайди, чунки англиялик мураббий ҳозирда Раҳимни жамоасига ёрдам бера оладиган футболчи деб ҳисобламайди.

2021 йилги Европа чемпионатида Раҳим Англиянинг асосий ўйинчиларидан бири бўлган ва жамоанинг финалга чиқишига ёрдам берган эди. Ўша турнирда Стерлинг учта гол урди ва битта голли узатмани амалга оширди.