Гонконг миллий терма жамоаси 22 март куни Вьетнамга қарши бўладиган Осиё кубоги-2015 саралаш баҳси учун тайёргарликни бошлади. Гонконгнинг кореялик бош мураббийи Ким Пан Гон Вьетнамга қарши ўйинда 3 очкони қўлга киритишни мақсад қилмоқда.

"Кучли ҳисобланган Вьетнам билан ўйинда бизни дуранг ҳам қаноатлантириши мумкин, аммо биз гуруҳ пешқадамига айланиш учун бу ўйинда ғалаба қозонмоқчимиз", дейди бош мураббий Ким.

Таъкидлаш лозим, гонконгликлар 6 февраль куни Тошкентда Ўзбекистон билан 0:0 ҳисобида дуранг ўйнаб, 1 очко билан ортга қайтишганди. Шундан сўнг бу терма жамоа ФИФА рейтингида 7 поғона кўтарилишга муваффақ бўлди.

"Вьетнам бизга нисбатан ФИФА рейтингида юқорироқда жойлашган (134, Гонконг — 168) ва Вьетнам чемпионати кучлироқ. Ўтган йилги ўртоқлик ўйинида веьтнамликлар 2:1 ҳисобида ғалаба қозонишганди. Лекин мен ўз шогирдларимга ишонаман ва улар бу сафар яхшироқ ўйнай олишади", дейди Гонконг бош мураббийи.

Ким Пан Гон 24 нафар футболчи билан машғулот ўтказмоқда. Бу жамоа "Пегасус" клуби билан назорат ўйинини ўтказди. Ўйинда 2:2 ҳисоби қайд этилди.

"Биз ўйинда турли вазиятларни синовдан ўтказдик. Натижа ҳам ижобий бўлди, дейди кореялик мутахассис. "Вьетнамни мағлуб этишни истаётганимиз боис, унга қарши ўйинда биз ҳужумга ўтишимиз керак. Лекин Вьетнамнинг қарши ҳужумларидан ҳам эҳтиёт бўлишимиз лозим. Биз барча нарсага тайёр бўлшимиз шарт".