“Милан”, “Ювентус”, “Реал”, Англия, Италия ва Россия терма жамоаларининг собиқ устози Фабио Капелло “Ювентус”нинг жорий мавсумдаги муаммолари ҳақида гапирди.
"Аввало, Аллегри Италия дербиси олдидан "Ювентус"ни "Интер"га яқин тутиб, ажойиб ишлар қилди. Бу икки жамоани сифат жиҳатидан солиштириб бўлмайди ва ҳаттоки ҳозирда иккинчи ўринда бораётган "Милан" ҳам "бянконери"дан кўра рақобатбардошроқ. "Интер"га қарши ўйин "Ювентус" футболчиларига икки жамоа ўртасидаги фарқни кўрсатди ва бу уларга катта таъсир кўрсатди.
"Интер" марказий ярим ҳимояда яхшироқ позицияга эга ва "Милан" чап қанотда Тео ва Леао билан 90 дақиқада ҳамма нарсани қила олади. "Ювентус"да Рабё ҳал қилувчи омил ва "Ювентус"нинг муаммолари франциялик футболчи энг яхши ҳолатда бўлмаган пайтда бошлангани бежиз эмас", - дея Капеллонинг сўзларини келтиради Football Italia.
Айни дамда Туриннинг “Ювентус” клуби 29 учрашувда 59 очко жамғарган ҳолда А Серия турнир жадвалида учинчи ўринда бормоқда.
