“Бунёдкор” – “Насаф” учрашувидан кейинги матбуот анжуманига биринчи бўлиб “Насаф” устози ташриф буюрди.

- “Бунёдкор”ни ҳақли ғалаба билан табриклайман. Бугун рақибларимиз биздан ҳар томонлама кучлилик қилди: тажриба борасида ҳам, тайёргарлик борасида ҳам. Дарвозабон – ярим жамоа деб бекорга айтишмайди. Ҳисоб 1:0 бўлиб турган пайтда Игнатий Нестеров “Бунёдкор”ни жуда қийин вазиятда қутқарди. Ким билади дейсиз, ўша пайтда ҳисобни тенглаштирганимизда ўйиннинг қолган дақиқалари бошқача кечармиди... Артур Геворкяннинг ўйини қовушмади, бироқ унга ишонишда давом этамиз. Эътибор беринглар: биз уч метрдан гол уролмаяпмиз, рақиб эса 25 метрлар чамасидан гол уряпти. Бугун етакчи футболчиларимиз жароҳати туфайли ёрдам беришолмади. Жумладан, Кенжа Тўраев. Ҳужумчи – гол уриши керак! Илҳом Шомуродов бутун ўйин давомида тиним билмаган бўлса-да, асосий вазифамизга эришиш учун унинг меҳнатлари етарли бўлмади, - дейди Рўзиқул Бердиев.