Ўзбекистон U-20 ёшлар терма жамоаси бош мураббийи Аҳмаджон Мусаев 25 март Туркиянинг Истанбул шаҳрида бўлиб ўтадиган ЖЧ-13 (U-20) финал босқичига қуръа ташлаш маросимида иштирок этади.

Ўзбекистон ёшлар терма жамоаси бош мураббийи Аҳмаджон Мусаев қуръа ташлаш маросимида иштирок этиш учун 24 март куни Истанбулга учиб кетади. Терма жамоа бош мураббийига сафар давомида Ўзбекистон ёшлар терма жамоаси матбуот котиби Бахтиёр Маметов ҳамроҳлик қилади. Қуръа ташлаш маросими якунига етгач, финал босқичида иштирок этадиган барча 24 терма жамоа вакиллари жаҳон чемпионати баҳслари бўлиб ўтадиган стадионлар, машғулотлар майдони ва турнир иштирокчиларига яратиб берилган шароитлар билан танишишлари мумкин бўлади.

Маълумот ўрнида, финал босқичига йўлланма олган 24 жамоа 6 гуруҳга сараланади. Жумладан, ёшлар ўртасида Европа қитъаси чемпиони Испания терма жамоаси «А» гуруҳининг биринчи жамоаси сифатида қайд этилди. Бу гуруҳдаги жамоалар барча учрашувларни Истанбулда ўтказади. Ўз қитъаларининг чепионлари ҳисобланган терма жамоалар эса, қуръа жараёнида 1-саватдан жой олишади. Осиё Футбол Конфедерацияси ҳамда Африка Футбол Конфедерацияси терма жамоалари 2-саватдан, КОНМЕБОЛ ва КОНКАКАФ терма жамоалари 3-саватдан, Европа қитъасидан финал босқичини қўлга киритган яна 5 терма жамоа 4-саватдан жой олади. Мусобақа мезбони - Туркия терма жамоаси ҳам, айнан 4-саватдан жой олади. Ташкилотчилар томонидан мусобақа давомида бир қитъа шарафини ҳимоя қиладиган терма жамоаларнинг гуруҳ босқичида бир-бирига тўқнаш келиб қолмаслиги мақсадида шундай қарорга келинган.

Истанбулда бўлиб ўтадиган қуръа ташлаш маросимида, шунингдек ФИФА томонидан U-20 жаҳон чемпионати ғолибига топшириладиган янги кубок тақдимоти бўлиб ўтади.