“Андижон” – “Насаф” жамоаларининг ўзаро ўйинлар тарихи 1997 йилнинг 30 мартидан бошланган. Орадан 27 йил ўтиб, 30 март санасида яна ушбу клублар ўзаро 45-ўйинда майдонга тушишади. Илк беллашувда дарвозалар дахлсиз қолган – 0:0.

“Андижон” “Насаф” устидан биринчи ғалабасини 1998 йилнинг 28 сентябрь куни нишонлаган. Олтинкўлдаги стадионда ўтказилган баҳсда андижонликлар 6:0 ҳисобида рақибини тор-мор келтиришган. Умумий кўрсаткич бўйича “Насаф” олдинда. Шу кунгача ўтказилган 44 та учрашувнинг фақат 7 тасида “Андижон”нинг қўли баланд келган. “Насаф” эса 27 та ўйинда ғолиб чиққан. 10 та баҳс дуранг натижа билан якун топган. Тўплар нисбати 49-94 “Насаф” фойдасига.

Ўтган йили бўлиб ўтган ўйинларга келсак, Қаршидаги учрашувда “Андижон” 0:1 ҳисобида ғалаба қозонган. Иккинчи даврада “Бобур Арена”даги баҳсда эса ҳисоб очилмаган – 0:0.