Охирги йилларда мамлакатимизда аёллар футболига бўлган эътибор тобора ошиб бормоқда. Эндиликда олий ва биринчи лига клублари қошида аёллар футбол жамоаси ҳам ташкил қилинмоқда. Мана шундай жамоалардан бири «Машъал» футбол клубида ҳам ташкил қилинди. Гуруҳ мураббийи Шерзод Андаев билан суҳбатлашганимизда қуйидаги маълумотларга эга бўлдик.

- «Машъал» жамоаси тасарруфида қизлар футбол гуруҳининг ташкил қилинганига бир ойдан ошди. Ҳозир ўзим машғулотларни ўтказиб турибман. Гуруҳда 18 нафар фақат мубораклик қизлар шуғулланмоқда. Машғулотлар бир ҳафтада уч маҳал бўляпти, яъни, сешанба, пайшанба ва шанба кунлари 1 соат-у 15 дақиқадан иборат. Айни пайтда машғулотларни футбол мактабимизга қарашли сунъий майдонда ўтказяпмиз. Яқин бир ой ичида ўртоқлик учрашувлари ўтказиш режада бор. Машғулотларда иштирок этаётган қизлар ҳақида нима дейишим мумкин? Спортчиларнинг ҳаммасида футболга қизиқиш бор, лекин улар орасида беш нафарининг иқтидори анча баланд. Гуруҳдаги футболчи-қизларнинг ўртача ёши 16-17 ёш атрофида.