Суперлиганинг 5-туридан ўрин олган “Бунёдкор” – “Динамо” учрашувидан сўнг "қалдирғочлар" устози Анвар Ғофуров ўз фикрлари билан ўртоқлашди.

"Бугун ҳар иккала жамоага ҳам очко керак эди. Ўз-ўзидан томонлар шунга ҳаракат қилди. Бизда ҳам рақибда ҳам дарвозани ишғол қилиш учун имкониятлар бўлди, аммо фойдалана олмадик. Афсуски, бизга ҳужумда совуққонлик етишмаяпти. Машғулотларда бу камчиликлар устида ишлаяпмиз, алоҳида вақт ажратяпмиз. Таркибимизда тажрибали футболчилар бор. Лекин рақобатни ошириш учун янада кучлироқ ўйинчиларни жалб қилишни ўйлаганмиз. Зеро, рақобат бор жойда албатта ўсиш бўлади.

Ҳеч ким атайин қизил карточка олай деб майдонга тушмайди, буниси аниқ. Тоҳир ўйинимизни кучайтиради деб умид қилгандик, аммо... Футболчи қандайдир сониялар ичида диққатни йўқотиши қизил карточкага сабаб бўлади. Бу футболнинг бир қисми. "Андижон"даги учрашувдан сўнг Усмонали ҳам анча сиқилди. Асосийси, бизда карточкалар атайин ишлатилган қўполликлар учун эмас. Қолганини йигитларга тушунтиришда давом этамиз.

Фарҳод ўз потенциалини тўлиқ намойиш қила олмаяпти. Олмалиқдаги учрашувда захирага олдим, машғулотларда ўзини кўрсатди, бугун яна таркибга қўйдим. Бироқ ўзини тўлиқ кўрсата олмади. Ўткировда потенциал юқори, биз унга ўзини кўрсатиш учун имконият берамиз, бироқ бунинг ҳам чегараси бор" - деди Ғофуров.