Мадриднинг “Атлетико” клуби бош мураббийи Диего Симеоне жамоа ҳужумчиси Мемфис Депай жароҳат олгани ва УЕФА Чемпионлар лигаси чорак финалида Дортмунднинг “Боруссия” жамоаси билан иккала ўйинни ҳам ўтказиб юбориши ҳақидаги хабарга муносабат билдирди.
"Мемфис биз учун муҳим футболчи, афсуски, клуб учун шундай муҳим вақтда жароҳат олди. Лекин, ҳар доимгидек, унинг йўқлиги муаммосини ҳал қилиш учун ечим излаймиз", - деди Симеоне Mundo Deportivo билан суҳбатда.
Олдинроқ Мадрид клубининг нидерландиялик ҳужумчиси Мемфис Депай мушакларидан жароҳат олгани маълум бўлганди. ОАВ хабарига кўра, футболчи тахминан 3-4 ҳафтани ўтказиб юборади.
Эслатиб ўтамиз, 10 апрель куни Испанияда УЕФА Чемпионлар Лигаси чорак финал босқичининг илк учрашуви Мадриднинг "Атлетико" ҳамда Дортмунднинг "Боруссия" клублари ўртасида бўлиб ўтади. Учрашув Тошкент вақти билан соат 23:59да бошланади. Жавоб ўйини 16 апрель куни бўлиб ўтади.
