Ўзбекистон чемпионати 3-тур доирасида Бекободда кечган маҳаллий "Металлург" ва Самарқанднинг "Динамо" клублари ўртасидаги ўйиндан сўнг (0:0) мезбонлар устози Рустам Мирсодиқовнинг ўйин ҳақидаги фикрлари билан қизиқдик.

— Ўзинглар гувоҳ бўлдиларинг, ўйин қийин кечди. Дастлабки икки турдаги ғалабадан сўнг, айниқса, Фарғонадаги қарши ҳужум тактикасидан кейин, ўз ўйимизда ҳужумкор ўйин кўрсатиш руҳий жиҳатдан мураккаб бўлишини йигитларга уқтирган эдим. Бу ўйинда ҳатто мағлубиятга ҳам учрашимиз мумкин эди. Шунга қарамай, йигитлар ҳаракат қилишди, биринчи бўлимда яхши вазиятлар вужудга келди, аммо омад келмаса қийин экан. Футболда омад деган нарса ҳам бор.

— Демак, Фарғонадаги ғалабани қарши ҳужум тактикаси билан боғлайсиз, тўғрими?
— Ҳа, ушбу ғалаба қарши ҳужум тактикаси эвазига киритилди.

— Жамоа етакчилар орасида бормоқда, жамоанинг ушбу мавсумдаги омадли старти йил давомидаги мақсадларига ўзгартиришлар кирита оладими?
— Жамоада авлодлар алмашуви кетяпти, асосан ёшларга эътибор қаратяпмиз. Ушбу ёшларнинг ўзаро тил топишишлари учун вақт керак бўлади. Иложи борича мухлисларни хурсанд қилишга ҳаракат қиламиз.

— Ҳикмат Ҳошимов тўғрисида сўрамоқчи эдик (Ҳикмат Ҳошимов дисквалификация туфайли дастлабки икки турни ўтказиб юборган, бугунги ўйинда ҳам ўйин тугашига саноқли дақиқалар қолганда майдонга тушди — stadion.uz)
— Ҳошимовда ўйин амалиёти кам бўлганлиги учун таваккал қилмадик, ишонаманки, у кейинги ўйинлара ёрдам беради. У тажрибали ўйинчи.

— Жамоанинг омадли стартида Туркиядаги йиғиннинг таъсири борми?
— Албатта. У ерда Украина, Болгария ва Молдова жамоалари билан тўртта ўйин ўтказдик. Бу ўйинлар шогирдларимга катта дарс бўлди ва фойдали бўлди.