11 март куни ЎФФ биносида аёллар футболига оид йиғилиш бўлиб ўтди. Бу йиғилишда қатнашган «Машъал»нинг янги спорт директори Абдураҳмон Юмангулов ўз фикрлари билан ўртоқлашди.
- Йиғилишда ЎФФ вице-президенти Сардор Раҳматуллаев, Аёллар футбол ассоциацияси президенти Алишер Султонов, шунингдек ЎФФ аёллар футболи бўлим бошлиғи Алишер Файзиев сўз олишди, - дея фикрини бошлади Абдураҳмон Рафаэлович. – Бунда асосан аёллар футболи бўйича республика биринчилигини қай тартибда ўтказиш масаласи кўриб чиқилди. Ҳозирги вариант бўйича аёллар ўртасидаги олий лига баҳслари шу йилнинг апрель ойидан старт олади. Ўйинлар икки босқичда ўтказилиши кутилмоқда. Биринчи босқичда жамоалар икки мантақага, яъни Шарқ ва Ғарбга бўлинишади. Ҳар бир минатақада 9та жамоа иштирок этишни ихтиёр қилган. Кейин олтитадан жамоа бирлашиб, жами 12 жамоа ўртасида иккинчи босқич ўйинлари ўтказилади. Мусобақада «Машъал»дан ҳам жамоа қатнашади ва бу жамоа «Машъал-W» деб номланади. Унга Шерзод Андаев мураббийлик қилади. Яқин орада «Машъал» футбол мактаби қошида футболчи қизлардан иборат яна иккита гуруҳ ташкил этишни мўлжаллаб турибмиз. Яъни, иқтидорлар орасидан 1999-2000 ва 2001-2002 йилларда туғилган спортчи қизларни саралаб оламиз.
Маълумот учун: Вазирлар Маҳкамасининг “Республикамизда аёллар футболини ривожлантиришга доир” қарорига биноан бу йилдан олий лиганинг ҳар бир клуби қошида профессионал тарзда фаолият юритадиган аёллар жамоаси бўлиши ва бу жамоа олий лига баҳсларида қатнашиши шарт. Бизга маълум бўлишича, ҳар бир клуб аёллар жамоаси учун ПФЛ ҳисоб-рақамига 10 миллион сўмдан бадал пули ўтказиб беради. Шунингдек, ҳар бир жамоа ўз спортчиларини фақат «Футбол-Мед»да тиббий кўрикдан ўтказишга мажбур.
