Испания учинчи дивизионининг 32-турида “Малага” “Атлетико Б” жамоасини мағлуб этди.

Ҳакамнинг учрашувни якунловчи ҳуштаги янграганидан сўнг “Малага” футболчиси Дани Лоренсо мухлисларнинг қўллаб-қувватлашига миннатдорчилик билдириш ва улар билан суратга тушиш мақсадида трибунага яқинлашди. Мухлислардан бири унинг либосини сўради ва унга 50 евро пул узатди. Ушбу вазият камераларга тушиб қолди.

Лоренсо нега мухлисдан пул олганига изоҳ берди: “Барчаси жуда тез рўй берди. Одамлар тушуниши керак: биз учинчи дивизионда ўйнаймиз, мен миллионер бўлишни хоҳласам ҳам, ҳозир ундай эмас.

Бизда либослар сони чекланган. Мен керагидан ортиқ либос тарқатиб бўлганман. Клуб либоснинг пулини маошимиздан олиб қолади. Буни мен трибунадаги одамга тушунтирдим ва у менга 50 евро узатди.

У мени ҳайрон қолдирди. Энди эса пулни олиб тўғри қилдимми ёки йўқми деб ўйлаб ўтирибман. Мен буни худбинлик учун қилмаганимни одамлар тўғри тушунади деб ўйлайман”.

Лоренсо жорий мавсум Испания учинчи дивизионида 30 та ўйин ўтказиб, 4 та гол ва 3 та голли узатмага муаллифлик қилди. “Малага” эса турнир жадвалида 61 очко билан 4-ўринда бормоқда.