ЦСКА клуби матбуот хизмати ярим ҳимоячи Аббос Файзуллаевни U23 Осиё кубогига қачон қўйиб юборишини маълум қилди.

"Ўзбекистон футбол ассоциацияси билан кўптармоқли мустаҳкам алоқалар ўрнатилганини кўпчилик билади. Шубҳасиз, Париж олимпиадаси учун саралаш босқичини ўтаб берадиган ёшлар ўртасидаги Осиё кубогининг муҳим эканини тушунамиз. Ўзбекистон олимпия ўйинлари йўлланмасини қўлга киритиб, тарихий воқеани қайд этиши мумкин. Шу боис, ушбу мусобақага Ҳукумат даражасида эътибор қаратилмоқда.

Аммо, шу билан биргаликда, ҳамкорларимиз клуб учун мавсумнинг муҳим палласи кечаётганини тушуниб турибди. Зич тақвим бизни кутиб турибди. Жамоа пайшанба куни «Спартак» клубига қарши муҳим ўйинни ўтказади. Мухлислар учун мазкур дерби қанчалар аҳамиятга эга эканини ортиқча тушунтириш шарт эмас. Айнан мазкур баҳсга қадар U23 Осиё кубогининг гуруҳ босқичи якунига етади. Ишончимиз комил, Ўзбекистон гуруҳ босқичини муваффақиятли босиб ўтади. Аббос эса «Спартак»га қарши ўйиндан кейин Осиё кубогининг чорак финалдан бошлаб Ўзбекистонга ёрдам бериши мумкин.

Муҳим ўйинларда мамлакат шаънини ҳимоя қилиш ҳар бир футболчи учун шарафли вазифа. Унда иштирок этиш Файзуллаев учун қанчалик муҳим эканини биламиз. Узоқ давом этган ва юқори даражадаги музокаралардан сўнг барча томонни қаноатлантирувчи ечим топилди.

Биз Аббосга муваффақият тилаган ҳолда унинг жамоага қайтишини кутамиз. Осиё кубогининг финал ўйини 3 май кунига белгиланган", — дейилади ЦСКА матбуот хизмати тарқатган хабарда.