Футзал бўйича Осиё Кубоги дастлабки чорак финал баҳси якунига етди. Унда Тожикистон ўз тарихида илк марта жаҳон чемпионатида иштирок этиш ҳуқуқини қўлга киритди.

Таиландда ўтаётган Осиё Кубоги дастлабки чорак финал баҳсида Пайрав Воҳидов мураббийлигидаги тожикистонликлар Афғонистон устидан 2:1 ҳисобида зафар қучиб, ярим финалга йўлланма олишди. Ярим финалда уларни Таиланд — Ироқ ўйини ғолиби кутиб турибди.

Шу тариқа, Тожикистон ўз тарихида илк марта жаҳон чемпионатига йўлланма олди. Тожикистон термаси Ўзбекистонда ўтадиган жаҳон чемпионатида йўлланмани қўлга киритган дастлабки жамоа бўлди.

Маълумот учун, Тожикистон гуруҳ босқичида Япония ва Жанубий Кореяни ортда қолдириб, 1-ўрин билан чорак финалга йўл олган эди.

Футзал. Осиё Кубоги

Чорак финал баҳси

24 апрель, чоршанба

Тожикистон – Афғонистон – 2:1

Голлар: 1:0 — Ризо Ҳусейнпур, (19 – автогол), 1:1 — Фарзод Маҳмуди (23), 2:1 — Файзали Сардоров, (47).