Ўзбекистон Суперлигаси 6-тури доирасида ўз уйида "Локомотив"ни йирик – 4:0 ҳисобида мағлуб этган Навбаҳор клуби бош мураббийи Самвел Бабаян ғалаба, Сайфиевнинг позицияси, Русланбек Жиянов ва олимпия терма жамоаси ҳақидаги саволларга жавоб берди.

"Биринчи тайм қийин кечди. Голгача деярли вазият ярата олмадик. Бунга ўзимиз ва рақиб ҳимояси сабаб. Наманганга келган барча жамоалар бизга қарши фақат ҳимояда ўйнайди. Бугун ҳам шундай бўлди. Рақиб ҳимояда мустаҳкам ўйнаб, тезкор қарши ҳужумларга таянди. Болтабоевнинг голи бизга ғалаба қозонишимиз учун туртки бўлди.

Фаррух Сайфиев универсал футболчи. Ярим ҳимоя чизиғида ўйнаб кўрган. Шунингдек, чап қанотда Иброҳим Йўлдошев билан тандем сифатида синаб кўрмоқчи эдик. Бу ҳақда уни ўзига айтдим. Менимча, ёмон ўйнамади.

Русланбек Жиянов бизнинг асосий ҳужумчиларимиздан бири. Кеча етиб келди ва бугуноқ майдонга тушди. Кеча соғлиғи бўйича бироз муаммолар бор эди. Бироз шамоллаган ва майдонга тушиши аниқ эмас эди. Бугун шифокорларимиз унга рухсат беришди ва унга имкон бердик. Жиянов Навбаҳорнинг асосий ўйинчиси. Чемпионат аввалида бизга ёрдам берди. Осиё чемпионлар лигасида ҳам анча фойдали ўйнади. Бизда ҳам энди олимпиадада қатнашадиган футболчи бор. Бундан фахрланамиз.

Иминжонов ўтган мавсумда биринчи лигада ўйнаган. Анча шижоатли ва келажаги бор ўйинчи. Унга бугун имкон бердик. Ҳали бизга ёрдам беради.

Олимпия терма жамоамизнинг натижаси "Олимпик" лойиҳаси тўғри бўлганини англатади. Бу ёшдаги истеъдодларни бир жамоага йиғиш орқали натижага эришиш мумкинлигини кўрдик. Умуман, ҳозир бизда бундай футболчилар кўп. Бу жуда қувонарли ҳол. Бу авлод келажак учун сармоя. Бу каби ёшлар бизни жаҳон чемпионатига олиб чиқа олади", — деди Бабаян.