"Реал"нинг ёш футболчиси Рафа Марин Ла Лиганинг "Депортиво Алавес" клубида ижара асосида яхши мавсумни ўтказмоқда.
21 ёшли футболчи юқори лигада тажриба орттириши учун ўтган ёзда вақтинчалик кетишга рухсат берилганди ва бу ҳаракат яхши натижа берди.
Шу даражадаки, "Реал Мадрид" кейинги мавсумда Карло Анчелотти қўл остида Маринни асосий таркибда ўйнатишни ўйламоқда.
Аммо "Лос-Бланкос"да Антонио Рюдигер, Давид Алаба ва Эдер Милитао борлигини ҳисобга олсак, унга имкон бериладими, деган савол бор.
Қолаверса, Начонинг кетиши ҳақида хабар берилган бўлса ҳам, бу ҳали тўлиқ кафолатланмаган.
Шу билан бирга, А Серия гиганти "Милан" ёзги трансфер ойнаси учун Рафа Маринга даъвогар сифатида пайдо бўлди.
Бу ҳақда Италиянинг маҳаллий нашри MilanNews.it хабар берди, унга кўра "россонерилар" ёзда янги марказий ҳимоячини сотиб олишни устувор вазифа қилиб қўйган.
"Милан" бу мавсумда "Алавес" сафида ўйнаган 21 ёшли футболчининг ўйинларидан ҳайратда қолгани маълум.
Ҳеч кимга сир эмаски, "Реал Мадрид" ва "Милан" ўртасида яхши иш муносабатлари мавжуд, улар сўнгги пайтларда Браим Диас ва Алекс Хименес каби футболчилар бўйича бир нечта шартномалар устида ишлаган.
