Суперлига 7-туридан ўрин олган «Олимпик» – «Пахтакор» (1:2) учрашувидан сўнг мезбонлар бош мураббийи Тимур Кападзе ўз фикрларини билдириб ўтди.

"Иккала жамоа ҳам яхши ўйин кўрсатишга интилди. Биринчи бўлим назоратимиз остида ўтди. Иккинчи таймда эса шерлар ҳам имкониятларга эга бўлди. Ҳисобни тенглаштиргач, дарвозамиздан яна тўп олиб чиққанимиз аламли бўлди. Умуман олганда, йигитлар яхши ҳаракат қилишди ва уларга ўз миннатдорчилигимни билдираман.

 «Пахтакор» иккинчи бўлимда анча ўйинга қўшди ва биз қарши ҳужумда ҳаракатлана бошладик. Рақиб яхши ҳимояланди дея оламан. Икки таймда ҳам яхши ўйнадик, аммо турли хил футбол намойиш этдик. Танаффусдан кейин жамоалар анча очилди ва вазиятлар пайдо бўла бошлади. Голларни индивидуал хатолар сабабли ўтказиб юбордик. Мағлубиятга лойиқ эмас эдик.

 Кубок беллашувларидан кейин ўртада пауза бўлди. Ўтган турни қўйиб юбордик.  Боғламлар ва ўзаро тушуниш бўйича кичик муаммолар кузатилган бўлиши табиий. Бу учрашувга 4 кун тайёргарлик кўрдик. Бу жиҳатлар учрашув давомида сезилди, деб ўйламайман", — деди Кападзе.