Суперлига 7-туридан ўрин олган "Нефтчи" – "Андижон" (2:2) учрашувидан сўнг мезбонлар бош мураббийи Виталий Левченко ўз фикрларини билдириб ўтди.

"Ўйин дербига хос бўлди. Муҳит Италия ёки Франциядаги сингари бўлди. Мухлислар томонидан яратилган бундай атмосферада футболчи истаса, истамаса олдинга боради. Бундай муҳитда ўйнаш ёқимли. 0:2 дан сўнг қайта олдик. Ҳар иккала жамоа мухлислари ҳам дербидан завқ олишди, деб ўйлайман.

"Андижон"да бўйдор ҳимоячилар мавжуд. Биринчи бўлимда Эффионг улар билан кўп бор курашга киришди. Иккинчи таймда эса улар бироз чарчади ва биз тезкор футболчиларни майдонга ташладик. Улар биз истаган тезликни, биз истаган прессингни қўшишди. Ўйиннинг боришини ўзгартира оладиган футболчилар борлиги бу яхши.

Олдинги чизиқда креативлик етишмади. Биринчи бўлимда имкониятлар бўлди. Улардан фойдаланиш лозим эди. Норчаевнинг йўқлиги ҳам сезилди. У майдонга қайтиши учун 10 кун керак.

Карпда соғлиғи билан муаммолари бор. У жароҳати билан майдонга тушди. Ғуломовда ҳам жароҳат мавжуд", - деди Левченко.