29 ёшли британиялик боксчи Шериф Лавал ўзининг дебют жангида рақибидан зарба ўтказиб юбориб, вафот этди.

12 май куни Лондонда ўтказилган турнирда Лавал португалиялик Малам Варелага қарши рингга кўтарилган. Вареланинг зарбасидан сўнг боксчи ҳушидан кетган. Шифокорлар 10-15 дақиқа Лавалга ёрдам беришга уринган, бироқ уни қутқариб қолишнинг иложи бўлмаган.

BoxingScene манбасининг хабар беришича, жанг учинчи раундгача тенг курашлар остида давом этган, раунд тугашига бир неча сония қолганда Шериф рақибидан зарбани ўтказиб юборган. Тўртинчи раунд бошида эса боксчининг аҳволи яхшидек кўринган, лекин яна бир зарбадан сўнг рингга йиқилган.

Британия бокс назорати кенгаши спортчининг вафоти муносабати билан ҳамдардлик билдирди.

Маълумот учун, Лавал бокс билан 2018 йилдан бери шуғулланиб келган. Унинг рақиби португалиялик Малам Валера эса аллақачон 6 та профессионал жанг ўтказишга улгурган.