Англиянинг «Ливерпуль» клуби ҳужумчиси Муҳаммад Салоҳ жамоадошларидан кимнинг кетиши уни энг кўп хафа қилгани ҳақида сўзлаб берди. Салоҳнинг ўзи ҳам шу ёзда эркин агент сифатида бошқа клубга ўтади.
Мисрлик футболчи Sky Sports эфирида ҳозирги ва собиқ жамоадошларининг видеомурожаатларини томоша қилди. Трент Александер-Арнольд ўз тилакларини билдирганида, «қизиллар» вингери шундай деди:
«У клубдан кетганида йиғлашимга сабаб бўлган ягона инсондир. Мен унинг онаси билан бирга йиғлаганман. Мен, у ва онаси — ҳаммамиз йиғлагандик».
Ҳозирда Александер-Арнольд Мадриднинг «Реал» клубида тўп тепмоқда. Унинг трансфери билан боғлиқ вазият «Ливерпуль» мухлислари ўртасида футболчининг обрўсига бироз путур етказган бўлса-да, жамоадошлари уни ҳамон катта ҳурмат билан эслашади.
