"Ливерпуль" бош мураббийи Юрген Клопп жамоа мухлисларидан келган хатлар ҳақида гапирди. Мураббий баъзи хабарлар мазмунидан таъсирланганини тан олди.

Аввалроқ мутахассис жорий мавсум якунида "Ливерпул"ни тарк этишини айтганди. У 2015 йилдан бери жамоани бошқариб келмоқда.

“Охирги бир неча ой ичида менга жуда кўп хатлар келди. Агар ҳаммага жавоб берсам, 2028 йилгача шу ерда бўламан, шунинг учун ҳаммага жавоб бермаганим учун узр сўрайман. Мен бу мактубларнинг баъзиларини кўзларим ёш билан ўқиб чиқдим, клуб баъзилар учун нимани англатишини билиб олдим. Буни қандай ҳал қилганимиз бизни хурсанд қилди. Бизнинг ўзгача мухлисларимиз бор ва сўнгги 9 йил улар учун кўп нарсани англатди, мен бундан жуда хурсандман", - дея Клоппнинг сўзларини келтиради BBC.

56 ёшли мураббий қўл остида "Ливерпуль" Англия чемпиони, шунингдек, Чемпионлар лигаси ғолибига айланди.