Қирғизистоннинг Жалол-Обод шаҳрида "Қурманбек" номидаги стадион таъмирлаш ишларидан сўнг фойдаланишга топширилди. Айни вақтда унинг футбол майдони сифатли кўриниш акс этган.
Майдон ўзбекистонлик мутахассислар томонидан янгиланди. Аренага гибрид майса ётқизилди. Сир эмаски, сўнгги 4 йилда Суперлига майдонлари навбатма-навбат замонавий кўринишга келтирилмоқда. Майсадан ташқари дренаж ва суғориш тизимлари талаб даражасига келтирилган. Бу эса ўз навбатида қўшни мамлакатлар футбол жамоатчилигининг эътиборидан четда қолмаяпти ва табиийки, ўзбекистонлик мутахассисларга бўлган қизиқиш ортиб бормоқда.
Эндиликда янги кўриниш хосил қилган Қурманбек стадионида Қирғизистон Премьер Лигаси доирасида "Мурас Юнайтед" жамоаси ўз уй ўйинларини ўтказади. Шунингдек, Бишкек шаҳрида ҳам 1 та сунъий ва 1 та ҳибрид замонавий футбол майдони бунёд этилиши кўзда тутилган. Мазкур ареналар майдони устида ҳам ўзбекистонлик мутахассислар фаолият олиб бораётганини қайд этиш керак. Улар бунга қадар Андижон, Наманган, Фарғона, Олмалиқ, Самарқанд, Бухоро, Қарши, Термиз ва Тошкент шаҳридаги 2 та футбол майдонини янгилаганди.