Дублинда УЕФА ижроия қўмитасининг йиғилиши бўлиб ўтди. Тадбир давомида 2026 йилда Чемпионлар лигасининг финал ўйини қаерда бўлиб ўтиши аниқланди. Шу тариқа, қитъанинг асосий клуб кубоги учун курашга Будапешт мезбонлик қиладиган бўлди.

2026/2027 йилги Чемпионлар лигаси финалига келсак, бу борадаги қарор сентябрга қолдирилди. УЕФА сайтида таъкидланишича, ташкилот Италия томонидан Миландаги "Сан-Сиро" стадионини реконструкция қилиш режасини кутмоқда.

Эслатиб ўтамиз, Чемпионлар лигасининг навбатдаги финали 1 июнь куни Лондондаги “Уэмбли” стадионида бўлиб ўтади. Кубок учун "Реал Мадрид" ва Дортмунднинг "Боруссия" клублари ўзаро кураш олиб боради.