Клаудио Раньери "Кальяри" мухлислари билан хайрлашар экан, кўз ёшларини тия олмади.
Бугун "қизил-кўклар" А Сериянинг 38-турида "Фиорентина"га ютқазиб қўйди - 2:3.
Бу ўйин Раньери учун "Кальяри"даги сўнгги учрашув бўлди. Старт ҳуштаги чалингунча клуб ва мухлислар мураббий шарафига бир қанча тадбирлар уюштиришди.
Ҳар икки жамоа мухлислари, ҳакамлари ва футболчилари 72 ёшли мутахассисни олқишлар билан кутиб олишди. Шу пайт у йиғлаб юборди.
Ўйин арафасида Клаудио бошқа клубларга мураббийлик қилмаслигини маълум қилди. У терма жамоалардан тушган таклифларни кўриб чиқишини истисно этмаяпти.
