Бундан роппа-роса 10 йил аввал, 2014-йилнинг 24-май куни Лиссабонда “Реал” ва “Атлетико” ўртасида Чемпионлар лигаси финал учрашуви бўлиб ўтганди.

Кубок учун кураш драматик кечди - 36-дақиқада Диего Годин ҳисобни очди, иккинчи бўлимга қўшиб берилган вақтнинг учинчи дақиқасигача “матрасчилар” олдинда боришаётган эди.

Кейин эса бурчак зарбасидан сўнг Серхио Рамос гол урди ва ҳисоб 1:1 бўлди. Асосий вақтда қўлдан бой берилган ғалаба “Атлетико” учун жиддий зарба бўлди.

Қўшимча бўлимларда Диего Симеоне шогирдлари ўз дарвозаларидан яна учта гол ўтказиб юборишди - Гарет Бэйл, Марсело ва Криштиану Роналду гол уришди.

"Реал Мадрид"нинг бу муваффақияти "ла деcима" деб номланади, чунки бу клуб тарихидаги 10-еврокубок бўлганди.

Ўшанда "қаймоқранглилар"нинг мураббийи Карло Анчелотти эди, у ҳозир ҳам жамоа билан ишлайди.

"Реал Мадрид" шу кунгача 14 марта еврокубокларда ғалаба қозонган. 1 июнь куни "Лос-Бланкос" 15-марта совринни қўлга киритиш имкониятига эга.

Финалда Анчелотти шогирдлари “Боруссия” билан куч синашади.