"Реал Мадрид"нинг 38 ёшли марказий ярим ҳимоячиси Лука Модрич 1 июнь куни бўлиб ўтадиган Чемпионлар лигаси финалидан сўнг дарҳол клуб билан ёзда якунланадиган меҳнат шартномасини узайтиради. Бу ҳақда Relevo хабар бермоқда.
Манбага кўра, хорватиялик футболчининг шартномаси бир йилга узайтирилади. Муддати узайтирилгач, Модрич Европа чемпионатига тайёргарлик кўриш учун Хорватия терма жамоасига жўнаб кетади.
"Реал Мадрид" Чемпионлар лигаси финалида Дортмунднинг "Боруссия"си билан ўйнайди. Учрашув Лондондаги "Уембли" стадионида бўлиб ўтади.
Жорий мавсумда Модрич барча мусобақаларда 44 та ўйинда қатнашиб, 2 та гол ва 8 та голли узатмани амалга оширди.
