Суперлига 9-туридан ўрин олган "Сўғдиёна" – "Бунёдкор" (4:0) учрашувидан сўнг меҳмонлар бош мураббийи Илёс Зейтуллаев матбуот анжуманида иштирок этди.

"Бундай мағлубиятдан кейин нимадир дейишга ҳам ҳайронман. 10-15 дақиқа давомида ўзимизга келишимиз қийин бўлди. Кўп нарсага ўзимни жавобгарлигимни ҳис қиламан. Қаердадир қўпол хатоларга йўл қўйдик. Балки футболчилар ҳам руҳий томондан тўлиқ тайёр эмасдирлар. Бундай хатолар устида ишлашга ва бундай вазиятдан чиқиб кетиш чорасини кўришга ҳаракат қиламиз.

Жисмоний ҳолатимиз таъсир қилди, демаган бўлардим. Ўйлашимча, олдинги учрашувларга нисбатан ёмон ўйнамадик. Биринчи голни ўтказганимиздан сўнг ўзимизни бироз йўқотиб қўйгандек тутдик. Рақиб жамоада тезкор футболчиларнинг кўплиги ҳисобига керакли жойларимизни ёпишга қийналдик ва кеч қолдик. Ушбу хатоларимизни тўғрилашга ҳаракат қиламиз. Энди кўзларимизни каттароқ очиб, кейинги учрашувларга тайёрланиш керак. Бундай натижаларни такрорлашга йўл қўймаслигимиз керак.

Ўйинчиларимиз "Насаф" ва "Локомотив"га қарши учрашувларда ўзларини кўрсатишди. Навбатдаги беллашувларда янада яхшироқ ўйнаб натижа кўрсатишга ҳаракат қиламиз. Бу – футбол. Унда ҳамма нарса бўлиши мумкин. Рақиб жамоани ғалаба билан табриклайман. Улар яхши ўйин намойиш этишди", — деди Зейтуллаев.