Олий лиганинг кетма-кетма 3 та учрашувида мағлуб бўлиб, мусобақа жадвалида сўнгги поғонани эгаллаб турган "Навбаҳор"да мураббий ўзгариши мумкин.

Кечаги мағлубиятдан сўнг "Навбаҳор" раҳбарлари Усмон Асқаралиев масаласини тезроқ кўриб чиқишни ўйлашмоқда. Бошқа манбадан олган маълумотларимизга қараганда Расул Низомбоев ўйиндан сўнг Усмон Асқаралиевга: "Бўшсиз!" деган.

Шу масала юзасидан кеча Усмон Асқаралиев билан гаплашганимизда, истеъфога чиқиши мумкинлигини, шунингдек, футболдан чарчаганлигини ҳам қўшимча қилиб ўтди. Бугун тушликдан сўнг клубда қолиш-қолмаслиги маълум бўларкан. Яна қуйидаги сўзларни Усмон Аҳмедович қўшимча қилди:

- Кечаги мағлубиятда бор айбни ўз бўйнимга оламан. Таркибни тўғри танлай оладим. Мен Расул Шуҳратовга имкон беришимнинг сабаби, уни Намангандаги биринчи ўйинда мухлисларнинг кўмагида чиройли ўйин кўрсатишига, ўзига бўлган ишончни қайтаришга ҳаракат қилгандим. Аъзам Алиев эса машғулотларда жуда яхши ҳаракат қилади. Лекин ўйинда эса бошқача ҳолат. Абдулазиз ва Собирда кичик жароҳатлар борлиги учун майдонга тушишмади. Ўйлайманки, мухлислар орасида мени тўғри тушунадиганилари бор.

Бугун мураббий масаласи аниқ бўлиши мумкин. Биздаги маълумотларга қараганда, "Навбаҳор" Виктор Жалилов, Амет Мемет, Раҳим Қурбонмамедов сингари аввал ҳам Наманганда ишлаган мураббийлар билан музокара олиб боришмоқда.

Эслатиб ўтамиз, Усмон Асқаралиев ўтган мавсумнинг иккинчи туридан сўнг ҳам "Навбаҳор"ни тарк этганди. Кейинроқ, яъни мавсум охирига келиб яна "Навбаҳор"да фаолиятни бошлаганди.

Зоҳидхон ИКРОМОВ тайёрлади.