«Нефтчи» – «Локомотив» учрашуви борасида ўз фикрлари билан ўртоқлашар экан фарғоналиклар бош мураббийи Юрий Саркисян жумладан шундай деди:

— Бугун ўз мухлисларимизни хурсанд қилиш ва ўйинда ғалаба қозониш мақсадида майдонга тушгандик. Аммо, хатоларимиз эвазига ўз дарвозамиздан тўп ўтказиб юбордик. Йигитлар имкон қадар муносиб ўйин кўрсатишга ҳаракат қилишди. Шу боис уларга ортиқча эътирозим йўқ. Рақиб жамоа сафида етакчи ўйинчилар кўп, бизда эса асосан ёшлар, клуб тарбияланувчилари тўп суришмоқда. Жамоа учраган кетма-кет мағлубиятлардан кейин мухлислар мени айблашмоқда. Тўғри, қайсидир маънода улар ҳақдир. Лекин, футболда кўпинча молиявий имконият кўп нарсани ҳал қилади. Бугун «Локомотив» жамоаси сафида собиқ шогирдларимдан Акмал Холматов ва Ислом Тўхтахўжаевлар тўп суришди. Шунингдек, Павел Смоляченко ҳам ушбу клуб шарафини ҳимоя қилмоқда. Агар моддий томондан имкониятимиз юқори бўлганда уларни асло қўйиб юбормасдик, — Юрий Вазгенович ўз сўзида.