«Нефтчи» - «Локомотив» учрашувидан сўнг жамоамиз бош мураббийи вазифасини бажариб келаётган Хаким Фузайлов ўйин борасидаги фикрлари билан ўртоқлашди.

— Барчага маълумки, Фарғонада ҳеч бир жамоа учун осон кечмайди. Бу ерда ҳамиша ўзгача футбол муҳити ҳукмронлик қилади. Албатта, бугун «Нефтчи» жамоасини мағлубиятга учратганимиздан хурсандман. Негаки, рақиб бизга жиддий қаршилик кўрсатди. Шу боис қайд этилган ҳисоб ўйинга мос тушди, деб айта олмайман. Баҳсда бизга омад кулиб боқди. Кетма-кет гол уриб устунликни ўз томонимизга оғдириб олдик, — деб гап бошлади Хаким Фузайлов.

— Рақиб сафида тўп сурган қайси футболчини алоҳида ажратиб кўрсатардингиз?
— Ушбу баҳсда «Нефтчи» сардори Мансур Саидов бошқаларга нисбатан анча фаол ҳаракат қилди. Фарғоналикларнинг аксарият ҳужумлари ҳам айнан шу футболчи орқали ташкил этилди.

— Шогирдларингиз сиз хоҳлаган ўйинни намойиш этяптими?
— Футболда ҳеч бир мураббий ўз жамоаси ўйинидан тўлиқ қониқиш ҳосил қилмайди. Мен ҳам бугунги кунда жамоа ўйинидан 100 фоиз кўнглим тўляпти, дея олмайман. Бошқача айтганда, ёрқин ўйинларимиз ҳали олдинда. Умид қиламанки, апрель ойида футболчилар янада ўсишга эришади.