Тўрт йилликнинг энг нуфузли мусобақаси - Париж-2024 Олимпиадаси стартига тобора оз фурсат қолмоқда.

Бугун Ўзбекистон дзюдо федерациясида айни шу мавзуда йиғилиш бўлиб ўтди. Федерация бош котиби Азиз Собиров, раис ўринбосари Зафар Қаҳрамонов, терма жамоалар менежери Элдор Қаҳҳоров ва бошқа масъуллар иштирокида ўтган йиғилишда дзюдочиларимизнинг олимпия ўйинларига тайёргарлик масаласи муҳокама қилинди.

Олимпиада бошланишига бир ярим ойдан сал кўпроқ қолмоқда. Мураббийлар ва масъуллар зиммасида дзюдочиларни ўша пайтга юқори спорт формасида тайёрлаб бориш вазифаси турибди. Йиғилишда бунинг учун федерация томонидан барча чора-тадбирлар амалга оширилиши айтилди.

Дзюдочиларнинг машғулотидан тортиб, то фармакология, витаминизацияси ва ҳатто уйидаги муаммоларигача эътибор қаратиш лозимлиги уқтирилди.