Бир ярим йил давомида "Қизилқум"да фаолият олиб борган Равшан Ҳайдаров, жамоанинг сўнгги пайтда кўрсатган ўйинларидан келиб чиқиб, раҳбарият билан келишган ҳолда истеъфога чиқишни маъқул кўрди.

2012 йилги мавсумда қийин ҳолатда жамоани биринчи лигага тушиб кетишидан қутқариб қолган Равшан Акмалович жорий мавсум олдидан ҳам жамоани янгитдан тузишга мажбур бўлди. Табиийки, бу ҳолат жамоанинг ўйинларига таъсир ўтказди. Бир неча жамоалардан аниқ таклифга эга бўлиб турган Ҳайдаров кетиш олдидан шундай деди:

- "Пахтакор"даги профессионал фаолиятимдан келиб чиқиб Зарафшонга янги қон олиб киришга ҳаракат қилдим. Биринчи йил буни уддасидан чиқдим деб ўйлайман. Қисқа фурсат ичида тузилган жамоа биринчи даврада яхши ҳаракат қилди. Клубнинг расмий сайти ишга тушди. Қолаверса, ОФКдан келган комиссияни аъло баҳога топширдик. Оз бўлсада жамоани профессионал кўринишга олиб келганимиздан хурсандман. Аммо жорий мавсумдаги натижалар туфайли бу ердаги фаолиятимни тугатиб янги ишга ўтишга қарор қилдим. "Қизилқум"даги ёрдамчиларим ўз ишларини давом эттирадилар ва жамоани қийин ахволдан олиб чиқиб кетадилар деган умиддаман. Энг муҳими қўл остимда ҳалол меҳнат қиладиган футболчилар йиғилганлар. Мен уларнинг келажакдаги ишларига омад тилайман”.

Шуни қўшимча қилиш керакки, бундан аввал Алексей Eвстафеев ҳам бор эътборини терма жамоаларга қаратишни мақул кўриб, "Қизилқум"даги фаолиятини тугатган эди.