Хабарингиз бор, Профессионал футбол лигаси одатга кўра, ҳар ой Суперлиганинг энг яхши мураббий, футболчиси ҳамда энг чиройли гол муаллифини аниқлаб келмоқда.
Ортда қолган май ойида Суперлигада 5 та тур баҳслари ҳамда Ўзбекистон Суперкубоги учун ўйин бўлиб ўтди. Ушбу учрашувлар давомида бир қатор футболчи ва мураббийлар ўзларини кўрсатишди.
Овоз бериш жараёнида мусобақаларни бевосита шарҳлаб бораётган, таҳлил қилаётган, мутахассис сифатида кузатаётган ва албатта бирор клубда фаолият олиб бормаётган нейтрал шахслар иштирок этди ва овоз бериш натижасига кўра, Қаршининг "Насаф" клуби бош мураббийи Рўзиқул Бердиев май ойининг энг яхши мураббийи деб топилди.
Рўзиқул Бердиев қўл остида "Насаф" 6 та ўйин ўтказиб, 3 та ғалаба қозонди, 3 та дуранг ўйнади. Тўплар фарқи 10:5.
