Испания терма жамоаси ҳужумчиси Альваро Мората терма жамоа тарихидаги энг яхши тўпурарлар рўйхатида тўртинчи ўринга чиққани ҳақида гапирди.

8 июнь куни Испания Шимолий Ирландияни 5:1 ҳисобида мағлуб этди. Мората ўйинда гол урди ва бу форварднинг терма жамоадаги 35-голига айланди.

31 ёшли футболчидан бор-йўғи 3 нафар футболчи кўпроқ гол урган - Фернандо Торрес (38 гол), Рауль (44 гол) ва Давид Вилья (59 гол).

“Мен бундан жуда фахрланаман. Бошимдан кечирганларим ҳақида ўйласам, ҳаммаси катта тарих. Қийин лаҳзалар, ўйнай олмаган баҳсларим, ютқазилган турнирлар бўлди.

Менга Фернандо Торрес, Рауль ва Давид Вилья каби одамларга яқин эканлигим ёқади. Бу ажойиб ўйинчилар ва мен буни таъкидламоқчиман.

Улар менга доим яхши маслаҳат беришган ва доим ёнимда бўлишган ва бундан жуда хурсандман", - дея Моратанинг сўзларини келтиради УEФА расмий сайти.