Юртимиз спорт тарихидаги муҳим мусобақа — футзал бўйича ФИФА Жаҳон чемпионатига қисқа муддат қолмоқда. Мазкур нуфузли мусобақага тайёргалик жараёни айни кунга келиб қизғин паллага кирди.
Бугун ЎФА раҳбарияти Бухоро вилоятидаги Жаҳон чемпионатига тайёргарлик жараёнини кўздан кечирди. Маълумки, Бухородаги «Универсал» спорт мажмуаси Футзал бўйича Жаҳон чемпионатининг гуруҳ босқичида Франция, Бразилия, Хорватия, Нидерландия, Гватемала, Венесуэла, Эрон, Парагвай, Куба ва Таиланд сингари номдир жамоалар иштирокидаги учрашувларни, шунингдек, плай-офф ўйинларини ўзида қабул қилади.
Бухоро вилояти ҳокими, вилоят футбол ассоциацияси президенти Ботир Зарипов, ЎФА биринчи вице-президенти Равшан Ирматов ҳамда Вазирлар Маҳкамаси спорт масалалари масъули Рашид Талипов бошчилигидаги ишчи гуруҳ «Универсал» спорт мажмуаси, майдони, жамоаларнинг кийим алмаштириш хоналари, медиа марказ, ташкилий-маъмурий объектлар ва машғулот залларини замонавий кўринишга келтириш ҳамда ФИФА стандартига мувофиқлаштириш бўйича ишларни ўрганди.
ОАВ, мухлислар ва ташриф буюрувчилар учун қулайликлар яратиш юзасидан кейинги режалар белгиланди. Иштирокчи жамоалар жойлашадиган меҳмонхоналар ўрганилиб, зарур тавсиялар берилди.
Шунингдек, инспекция давомида Бухоро мезбонлик қиладиган ФИФА Жаҳон чемпионатини ўйинларини юқори савияда ташкил этиш бўйича навбатдаги ишлар муҳокама қилинди.